A tous les historiens dans l'âme, à tous ceux qui chantent le fin'amor, aux descendants des troubadours et des trouvères, à leurs Dames... à la mienne...
¨
Tuit mi desir et tuit mi grief tourment
Mainnent de la ou tuit sont mi pensé.
Grant merveille ai que trestoute la gent
Qui ont veü son cors gent honoré
Sont envers lui de bone volenté.
Et Dieus l'ainme, je sai a essïant;
Grant merveille est quant Dieus en suefre tant.
Touz esbahiz m'en vois esmerveillent,
Ou Dieus trouva si tres grande biauté;
Quant il la mist sa jus entre la gent,
Moult nous en fist grant debonaireté.
Trestout le mont en a enluminé,
Et tuit li bien sont en lui si tres grant;
Nus ne la voit ne nous en die autant.
Bone aventure aveinne a fol espoir,
Qui les amans fet vivre et resjoïr.
Desperance fet languir et doloir,
Et mes faus cuers m'i fait cuidier garir;
S'il fust sages, il se laissast morir.
Pour ce est il bon de folie avoir
En trop grans sans puet il bien mescheoir.
Qui la voudroit a droit ramentevoir
Ja n'avroit mal, ne l'esteüst garir.
Car elle fait trestouz ceus mielz valoir
Qui ele veust doucement recoillir.
Hé! las, tant fu si grief li departirs.
Amours, merci! Faites li a savoir:
Cuers qui n'ainme ne puet grant joie avoir.
Souveigne vous, dame, du dous acueil
Qui ja fu fez par si grant desirrer,
C'onques n'orent tant de povoir mi oil
Que droit vers vous les osasse lancier.
Ne ma boche ne vous osa prïer,
Ne poi dire, dame, ce que je veil;
Tant fui couars dolanz, c'ancor m'en dueil.
Dame, se je vous puis mais desrainnier
Je parlerai trop mielz que je ne seil
S'amours me laist qui trop me mainne orgueil.